धरान, २७ भदौ । वी.पी. कोइराला स्वास्थ्य विज्ञान प्रतिष्ठानको विद्यार्थी कल्याण समाजको निर्वाचन सम्पन्न भएको छ । लामो समयदेखि हुन नसकेको विद्यार्थी कल्याण समाजको निर्वाचन आइतबार भएको हो ।  प्रत्येक २/२ वर्षमा हुनुपर्ने उक्त निर्वाचन ७ वर्षपछि भएको हो ।

निर्वाचनले ओम शान्ति रजकको अध्यक्षतामा नयाँ कार्य समिति गठन गरेको छ । आचार्यले ५४४ मत ल्याएर विजयी भएका हुन् । नव गठित कार्य समितिको वरिष्ठ उपाध्यक्षमा यादव अर्याल रहेका छन् । उनी निर्विरोध भएका हुन् । तीन जना उपाध्यक्षमा एमविविएसबाट एञ्जिला कुँवर, विडिएसबाट मिरा देवी आचार्य र नर्सिङ्गबाट अमिशा बराइली निर्वाचित भए ।

समाजको महासचिवमा सलमान हैदर हुसेन निर्वाचित हुँदा सचिवमा जमुना बन, कोषाध्यक्षमा सुदर्शन साह निर्वाचित भएको प्रतिष्ठानका सह–प्रवक्ता डा. चुरामणी पोखरेलले जनाएका छन् । समाजको सदस्यहरुमा डा. पवन उपाध्याय, डा. मनोज आचार्य, डा. निराजन पराजुली, अमित कुमार, सागर कार्की, सिद्धार्थ साह, मृणांक यादव, गीवर्ण पाण्डे, दिवेश कुमार मण्डल रहेका छन् ।

यस्तै अन्य सदस्यहरुमा दिवश पन्त, सुयोग झा, रमेश बहादुर बुढा, सदस्य अपेक्षा उप्रेती, माधव सर्राफ, शान्तीराम तिम्सिना, मिलन घिमीरे रहेका छन् । २७ सदस्यीय समाजमा १९ जना निर्वाचनबाट चयन भएका हुन् ।  

निर्वाचित पदाधिकारी तथा सदस्यहरुको प्रतिष्ठानको अडिटोरियम हलमा पदस्थापना तथा शपथग्रहण गरिएको थियो । उक्त कार्यक्रममा प्रतिष्ठानका उपकुलपति डा. ज्ञानेन्द्र गिरीले विजयी विद्यार्थीहरुलाई बधाई दिँदै प्रतिष्ठानको विकास र विस्तारमा विद्यार्थी कल्याण समाजले महत्वपूर्ण भूमिका निर्वाह गर्ने विश्वास व्यक्त गरेका थिए ।

कार्यक्रममा शिक्षाध्यक्ष प्रा.डा. गुरुप्रसाद खनाल, रजिष्ट्रार डा. सुर्य प्रसाद संग्रौला लगायत शिक्षक, कर्मचारी र विद्यार्थीहरुको उपस्थिती रहेको थियो । समाजको निर्वाचनका लागि डा.शमशेर श्रेष्ठको अध्यक्षतामा ७ सदस्यीय निर्वाचन समिति गठन गरिएको थियो । उक्त समितिले गत भदौ १७ गते निर्वाचन सम्पन्न गरेको थियो । प्रतिष्ठानको सञ्चालक परिषद ३२ औं सभाको निर्णय एवं कार्यकारीणी समितिबाट पारित विधान अनुरुप समाजको निर्वाचन भएको बताइएको छ ।