काठमाडौं, २५ साउन । काठमाडौंका विभिन्न स्थानमा निःशुल्क स्वास्थ्य शिविर सञ्चालन गर्दै आइरहेको काठमाडौं मेडिकल कलेज (केएमसी)ले काठमाडौं महानगरपालिका वडा नं. ३२ को सेतीओपी मार्गमा निःशुल्क स्वास्थ्य शिविर सञ्चालन गरेको छ ।

बुधबार फास्टफुड एशोसिएनसँगको सहकार्यमा आयोजित स्वास्थ्य शिविरमा ९६३ बिरामीको निःशुल्क स्वास्थ्य परीक्षण गरिएको छ । केएमसीका जनरल मेनेजर नारायण दाहालका अनुसार निःशुल्क स्वास्थ्य शिविरमा ११४ जनाको इसिजी, १९७ जनाको ल्याव परीक्षण तथा १७२ जनाको युएसजी गरिएको छ ।

यस्तै, २७ जनाको दाँत खोलिएको थियोभने, ४१ जनालाई थप उपचारका लागि ओ.टी. रेफर गरिएको छ । आम सर्वसाधारणलाई स्वास्थ्य सेवामा पहुँच पुर्याउने अभिप्रायले केएमसीले निःशुल्क स्वास्थ्य शिविर सञ्चालन गरेको हो ।

शिविरमा युएसजी, इसिजी, ल्याव लगायत स्वास्थ्य उपकरणहरु सहित केएमसीका विभिन्न रोगका विशेषज्ञ डाक्टर, नर्स तथा कर्मचारीहरु सहभागी हुने भएकाले सर्वसाधारणहरुले आफ्नो स्वास्थ्य कस्तो छ भन्ने समेत जानकारी पाउने गरेका छन् ।

केएमसीका कार्यकारी अध्यक्ष डाक्टर सुनिल शर्माले निःशुल्क स्वास्थ्य शिविरले आम जनतामा स्वास्थ्य सेवाको पहुँच बढाएको बताउँदै आउँदा दिनहरुमा पनि निःशुल्क स्वास्थ्य शिविरलाई प्रभावकारी रुपमा लैजाने बताए ।