भक्तपुर । चाँगुनारायण नगरपालिकाका नवनिर्वाचित मेयर जीवन खत्रीले विपद् व्यवस्थापन कार्ययोजना बनाउन निर्देशन दिएका छन् । सोमबार नगरपालिकाको स्वास्थ्य शाखाले आयोजना गरेको अन्तरक्रियामा मेयर खत्रीले वर्षायाम सुरू भएसँगै हुनसक्ने सम्भावित जोखिम न्यूनीकरण गर्न नगरस्तरीय विपद् व्यवस्थापन कार्ययोजना बनाउन निर्देशन दिएका हुन् ।

चाँगुनारायण नगरपालिका विभिन्न प्राकृतिक प्रकोपको जोखिममा रहेकाले विपद्बाट हुने क्षति कम गर्न, विपद् प्रभावितको तत्काल उद्दार र राहत पुग्ने कार्यक्रम समावेश गरि कार्ययोजना बनाउन मेयर खत्रीले निर्देशन दिएका छन् । ‘चाँगुनारायण नगरपालिकाका धेरै ठाउँहरु प्राकृतिक जोखिमपूर्ण रहेका छन् वर्षायामसँगै ती क्षेत्रमा कुनैपनि बेला प्राकृतिक विपत्ती आउन सक्ने भएकाले आजैबाट विपद् व्यवस्थापनको कार्य योजना बनाउन निर्देशन दिन्छु ।’ खत्रीले भने ।

विभिन्न महामारी जन्य रोगहरू र प्राकृतिक प्रकोपहरूको रोकथाम नियन्त्रणका लागि सरोकारवालाहरूसँग अन्तरक्रिया तथा आरआरटी स्वास्थ्यकर्मी परिचालन कार्यक्रममा उनले चाँगुनारायणवासीलाई स्वस्थ बनाउन स्वास्थ्यकर्मीहरूको भूमिका महत्त्वपूर्ण हुनेपनि जिकीर गरे ।

कार्यक्रममा बुढानिलकण्ठ नगरपालिकाको स्वास्थ्य शाखा अधिकृत कुमारप्रसाद दाहालले समयमै योजना बनाएर काम गर्दा विपद्बाट हुने क्षतिलाई कम गर्न सकिने जनाए ।  नगरपालिकाको स्वास्थ्य शाखा प्रमुख सत्यकुमार दुवालले नगरपालिकाले महामारी नियन्त्रणका लागि काम गरिरहेको जनाए ।