भक्तपुर । चाँगुनारायण नगरपालिका वडा नम्वर १, २, ३ र ४ जोड्ने मुल सडक सल्लाघारी चाँगु सडक एक वर्ष भित्र कालोपत्रे गर्न आफूहरु लागि पर्ने चाँगुनारायण नगरपालिकाका मेयर जीवन खत्रीले बताएका छन् । दुवाकोट केएसी चोकमा ढल निकास व्यवस्थापन कार्यको शिलान्यास गर्दै खत्रीले एक वर्ष भित्र सडक कालोपत्रे सम्पन्न गर्न आफूहरु लागि पर्ने बताए ।

बाटो पहिला नै सम्पन्न हुनु पर्ने भएपनि विभिन्न प्राविधिक कारणले सम्पन्न हुन नसकेको बताउँदै मेयर खत्रीले बाटो छिटो भन्दा छिटो सम्पन्न गर्न आफूहरु अहोरात्र खट्ने जिकीर गरे । उनले जनताले गरेकाे विस्वासलाई निराश हुन नदिने बताए ।

जनताका दैनिक जीवनलाई सहज बनाउन नै जनप्रतिनिधिको आवश्यकता भएकाे भन्दै भने–‘हामी जनताको सेवामा छौं यो दायीत्व र कर्तव्यबाट हामी पन्छने छैनौं ।’ मेयर खत्रीले भने । उनले ढल निकासको काम समयमा सम्पन्न गर्न निर्माण व्यवसायीलाई आग्रह पनि गरे ।

नगरमा समस्याको रुपमा रहेको डुुवान र सडक कटानको समस्याबाट क्षतीको न्यूनिकरण गर्न सबै मिलेर निकास निकाल्नु पर्ने खत्रीले बताए । स्थानीय क्लव टोल कमिटि आदीको सक्रिय सहभागितामा आफ्नो घर नजिकको कुलो खोल्सा बाटोबाट बग्ने पानी नियन्त्रण गर्न सहयोग गर्न अनुराेध गरे ।