सुनसरी । पाँच वर्षअघि कक्षा ९ मा अध्ययनरत एक विद्यार्थीलाई बलात्कार गरेको अभियोगमा इटहरीको ब्लूमिङ लोटस इंग्लिस स्कुलका तत्कालीन प्रिन्सिपल पक्राउ परेका छन् ।

नेपाल प्रहरीको केन्द्रीय अनुसन्धान ब्यूरो (सीआईबी) ले तत्कालीन स्कुलका प्रिन्सिपल राजकुमार खड्कालाई पक्राउ गरेको एसपी कमल थापाले जानकारी दिएका छन् । उनलाई जिल्ला प्रहरी कार्यालय सुनसरी पठाइएको छ । एक छात्रा विद्यार्थीलाई उपचारका लागि अस्पताल लैजाने बहानामा होटलमा लगेर तत्कालिन प्रिन्सिपल खड्काले बलात्कार गरेको आरोप छ । खड्काले घटनापश्चात पनि स्कुलबाट रेष्टिकेट गरिदिने भन्दै दुई वर्षसम्म बलात्कार गरेको आरोप छ ।

काठमाडौंका एक कन्सल्टेन्सी सञ्चालकले सौन्दर्य प्रतियोगिताको नाममा प्रतिष्पर्धीलाई बलात्कार गरेको घटना सार्वजनिक भएपछि सामाजिक सञ्जाल मार्फत नै यो घटना पनि सार्वजनिक भएको थियो । २०७४ साउन २६ गते धरान उपमहानगरपालिका–१० स्थित जनहित गेस्ट हाउसमा लगेर प्रिन्सिपल खड्काले बलात्कार गरेका हुन् ।

त्यसपछि अर्कै विद्यालयमा पढिरहेकी छात्रालाई विहे गर्छु भनी फकाउने तथा समाजमा वेइज्जत गरीदिने धम्की दिदै पटक–पटक मानसिक तनाव दिदै जबरजस्ती करणी गरेको भनी पीडितले २०७५ भदौ २ गते जिल्ला प्रहरी कार्यालय सुनसरीमा जाहेरी दिएकी थिइन् ।

‘होस्टलमा बसेका बेला मेरो छातीमा समस्या देखियो, त्यसको उपचार गर्न विदेशबाट बुबाले प्रिन्सिपलको खातामा पैसा पठाउनुभएको थियो । बुबाले मलाई प्रिन्सिपलसँग सिधै अस्पताल जान भन्नुभएको थियो, तर उसले अस्पताल लैजानुको साटो मलाई होटल लग्यो ।’ सामाजिक सञ्जालमा ती किशोरीले उल्लेख गरेकी छन् ।

पिडित छात्राका अनुसार उनी त्यो बेला १५ वर्षको थिइन् । अस्पताल लैजाने भन्दै प्रिन्सिपलले होटलको कोठामा लगेर चुकुल लगाएर जबरजस्ती करणी गरेको उनको भनाइ छ । ‘छात्राले प्रिन्सिपलले त्यसबेला भिडियो पनि बनाएको बताउँदै आफुलार्ई पटकपटक उक्त भिडियो देखाएर ब्ल्याकमेल गरेको समेत भनेकी छन् । साथै उनले आफुलाई एसईई दिउञ्जेलसम्म बाथरुम, विज्ञान प्रयोगशाला, कम्प्युटर प्रयोगशाला, अफिस, होस्टेल कोठा, जहाँसुकै जहाँ भेटेपनि बलात्कार गरेको खुलाएकी छन् ।

खड्का हाल काठमाडौँको नेपालटारमा रहेको सिद्धार्थ ईंङलीस बोडिङ स्कुलमा प्रिन्सिपलकै रुपमा कार्यरत थिए । पीडित युवतीले सामाजिक सञ्जालमा उनी विरुद्ध पोष्ट गरेपछि खड्का फरार थिए ।