दुहवी । सुनसरीको बर्जु गाउँपालिकामा निर्वाचित जनप्रतिनिधिहरुको विजयी र्याली निकालिएको छ । बैशाख ३० गते सम्पन्न स्थानीय तहको निर्वाचनमा नेकपा एमालेबाट बर्जु गाउँपालिकामा निर्वाचित अध्यक्ष उपाध्यक्ष वडाध्यक्ष तथा वडा सदस्यहरुलाई पालिका परिक्रमा गराइएको हो ।

विजयी अध्यक्ष, उपाध्यक्ष सहितको जनप्रतिनिधिहरु बर्जुको चिमडी, अमाहीबेला, अमडुवा लगायतका स्थानको परिक्रमा गरिएको थियो । विजय र्यालीमा नेकपा एमालेकी केन्द्रीय सदस्य तथा जिल्ला सह–इन्चार्ज भगवती चौधरीसमेतको सहभागिता रहेको थियो ।

बर्जु गाउँपालिकामा नेकपा एमालेले ऐतिहासिक जित हासिल गरेको भन्दै एमालेका नेता तथा कार्यकर्ताहरुले नवनिर्वाचित जनप्रतिनिधिहरुलाई अबिरमालाले स्वागत गरेका थिए ।

पालिकाको अध्यक्षमा नेपाली कांग्रेसका रघुनन्दन चौधरीलाई पराजित गर्दै एमालेका जिवछ कुमार राय तथा उपाध्यक्षमा कांग्रेसकै संगीता रायलाई पराजित गर्दै नितु चौधरी निर्वाचित भएका छन् ।

बर्जुको ८ वटा वडामध्ये वडा नं. १ मा दिलबहादुर गुरुङ, वडा नं. २ मा महेन्द्रप्रसाद कामत, वडा नं. ३ मा बिनोद गुरुङ, वडा नं. ४ मा बिनोद कुमार गुरुङ, वडा नं. ५ मा अजयकुमार चौधरी तथा वडा नं. ६ मा अशोक कुमार चौधरी प्यानलै विजयी भएका छन् । वडा नं. ७ र ८ मा नेपाली कांग्रेसका उम्मेदवार निर्वाचित भएका छन् ।