काठमाडौं । भदौ २३ र २४ गते देशव्यापी रुपमा भड्किएको जेन-जीकाे आन्दोलनले नेपालको सुरक्षा संयन्त्रलाई संकटमा धकेल्दा मकवानपुरकाे इलाका प्रहरी कार्यालय पशुपतिनगरलाई भने एक प्रहरी निरीक्षककाे कार्यकुशलताले जाेगाएकाे छ । मकवानपुर जिल्ला इलाका प्रहरी कार्यालयकी प्रहरी निरीक्षक विमला कुमारी कठायतकाे कुशल नेतृत्वले इप्रका कार्यालयसँगै साे मातहतका प्रहरी चाैकीहरू भने आन्दोलनकारीकाे निशानामा पर्न सकेनन् । 

इलाका प्रहरी कार्यालयलाई जोगाउन कार्यालय प्रमुख प्रहरी निरीक्षक विमला कुमारी कठायतले देखाएको नेतृत्व, संयम, रणनीति र त्यहाँ कार्यरत प्रहरीहरूको अनुशासन निर्णायक सावित भएकाे भन्दै प्रशंसा भइरहेकाे छ । कठायतले स्थानीय समुदायसँग विगतदेखि नै मैत्रीपूर्ण र विश्वासपूर्ण सम्बन्ध विकास गरेकीले जेन-जीकाे आन्दोलनको आगो फैलिँदा स्थानीय बासिन्दाहरू नै प्रहरीसँगै उभिँदा साे क्षेत्रका प्रहरी कार्यालयहरू सुरक्षित भएका हुन् । त्यसाे त “प्रहरी मेरो साथी” भन्ने अवधारणा व्यवहारमै मूर्तरूप लिन सफल भएकाे याे उच्चतम उदाहरण हाे ।

हेटौंडा उपमहानगरपालिकाको १० वटा वडाहरू इलाका प्रहरी कार्यालय पशुपतिनगर मातहतमा पर्छन् । यही क्षेत्रमा हेटौंडा औद्योगिक क्षेत्र, हेटौंडा सिमेन्ट, शिवम सिमेन्ट र रिद्धिसिद्धि सिमेन्ट उद्योगजस्ता ठूला उद्योग छन् । बागमती प्रदेश सरकारका मन्त्रीहरूको निवास पनि यही क्षेत्रमा पर्दछ । अझ गम्भीर कुरा, नेपालकै धेरै अपराधजन्य गतिविधिहरू हुने पदमपोखरी क्षेत्र पनि यही छ ।

यस्तो संवेदनशील क्षेत्रमा आन्दोलनकारीले उद्योग, मन्त्री निवास र प्रहरी कार्यालयमा आक्रमण गर्ने प्रयास गर्दा कठायतले अपनाएको संयमता र "यो सम्पत्ति तपाईहरुकै हो" भन्ने चेतनामूलक अपिलले आन्दोलनकारीहरूकाे आक्रोशलाई शान्त बनाउन सकेकाे हाे । भदौ २४ गते बिहानैदेखि आन्दोलन सुरु हुनासाथ इप्रका पशुपतिनगर मातहतका सबै प्रहरीलाई उच्च सतर्कतामा राखिएकाे थियाे । कार्यालयमा रहेका प्रत्येक भौतिक सामग्री र हतियारलाई व्यक्तिगत जिम्मेवारीसहित प्रहरीहरूलाई हस्तान्तरण गर्ने निर्णय लिइएकाे थियाे भने, आन्दोलनकारी मन्त्री निवासमा छिर्न खोज्दा सम्झाइ-बुझाइ गरेर फर्काइयो । यसरी, प्रहरी कार्यालय मात्र नभई उद्योग, मन्त्री निवास र समुदाय समेत सुरक्षित राख्न सकिनु, नेपालको सुरक्षा संयन्त्रकै लागि गौरवको विषय भन्दै प्रहरी निरीक्षक कठायतकाे चाैतर्फी प्रशंसा भइरहेकाे छ । 

समुदाय र प्रहरीबीचको विश्वास, सहकार्य र साझेदारी नै वास्तविक सुरक्षा भएकाे ठहर गरिएकाे छ । ‘जब प्रहरी नागरिकसँग मिलेर काम गर्छ, तब प्रहरी कार्यालय मात्र होइन, सम्पूर्ण समाज सुरक्षित रहन्छ ।’ स्थानीयकाे धारणा छ । 

हेटौंडा उपमहानगरपालिका–१५ को वडा कार्यालयमा सामान्य भौतिक क्षति भए तापनि अन्य सबै क्षेत्रमा पूर्ण सुरक्षा रहनु र इलाका प्रहरी कार्यालय पशुपतिनगर मातहतका आठवटा प्रहरी कार्यालयहरूको पूर्ण संरक्षण हुनु, प्रहरी निरीक्षक विमला कुमारी कठायतको दूरदर्शी नेतृत्वकै प्रतिफल भएकाे जिकीर छ ।