काठमाडौं । नेकपा एमालेका सांसद तथा पूर्वमन्त्री भगबती चौधरीले स्वदेशमै व्यवसाय गर्ने वातावरण सिर्जना गर्नुपर्नेमा जोड दिनुभएकाे छ । अर्थ समितिको सोमबार बसेको बैठकमा बोल्दै उहाँले त्यस्तो आग्रह गर्नु भएकाे हाे । 

समितिमा सोमबार आर्थिक विधेयक मार्फत सुन, चाँदी र गरगहनामा लगाइएको करका सम्बन्धमा नेपाल सुनचाँदी व्यवसायी महासंघले दिएको निवेदन र बैङ्क तथा वित्तीय संस्था सम्बन्धी ऐन, २०७३ लाई संशोधन गर्न बनेको विधेयकको सम्बन्धमा आन्तरिक छलफल भएको थियाे । सो अवसरमा बोल्दै पूर्वमन्त्री चौधरीले व्यवसायी लगानीकर्तामाथि धेरै कडाइ गर्न नहुने बताउनु भयाे ।

अवैधानिक रूपमा व्यापार व्यवसाय गर्नेहरूमाथि मात्रै निगरानी बढाएर करको दायरामा ल्याउन जरुरी रहेको उहाँको भनाई थियो । उहाँले डायमन्डमा लगाइएको विलासिता कर हटाउनुपर्ने पनि बताउनु भयाे । 'यदि व्यवसायी लगानीकर्ता सबैलाई फस्टाउनु छ यसरी टाइट गर्ने हो भने झनै समस्या आउँछ । अहिलेको अवस्था त यति नैराश्यता छ । हाम्रो मार्केट, अर्थतन्त्र यति तल झरिसकेको छ', उहाँले भनिन्, 'यो तरिकाले झनै तल खस्किन्छ । डायमन्डमा लग्जरी कर जुन छ त्यसलाई हटाउनुपर्छ । आम उपभोक्ताले बढी प्रयोग गर्ने चिजमा कर बढाइदिए मारमा उनीहरू नै पर्दछन् । हामी उद्योगधन्दा फस्टाउन चाहन्छौँ, यहीँ व्यवसाय गर्न दिने हो भने टाइट नगरौँ ।’

आम उपभोक्ताले बढी प्रयोग गर्ने चिजमा कर वृद्धि गरे उपभोक्ता मारमा पर्ने उहाँको भनाई थियो ।