धरान, १३ मंसिर । आफुलाई पर्यटन मन्त्रालयको शाखा अधिकृत बताउँदै कारमा सवार भएर आएका एक ब्यक्ति मदिरा चोरी गरेको आरोपमा पक्राउ परेका छन् । सुनसरीको धरान बजारका विभिन्न पसलबाट आफु पर्यटन मन्त्रालयको शाखा अधिकृत हुँ भन्दै ब्रान्डेड मदिरा माग्ने र मौका परे चोर्दै समेत हिँड्ने गरेको आरोपमा विकास साह पक्राउ परेका हुन् ।
 
धरानका फरक फरक मदिरा पसलमा उनले आफूलाई पर्यटन मन्त्रालयको शाखा अधिकृत र बीपी प्रतिष्ठानको डाक्टर हुँ भन्ने गरेका पाइएको प्रहरीको प्रारम्भिक अनुसन्धानमा देखिएको छ । कारमा सवार हुने उनले दर्जनौं व्यवसायीलाई ठग्नुका साथै ब्रान्डेड मदिरा चोरेर हैरान पारेको अनुसन्धानबाट खुल्नमा आएको छ ।

साह मंगलबार मदिरा व्यवसायीकै फन्दामा परेका हुन् । उनलाई धरानको भानुचौकमा मदिरा चोर्दाचोर्दै नियन्त्रणमा लिएर इलाका प्रहरी कार्यालयमा बुझाइएको धरानस्थित मनकामना कोल्ड स्टोरका सञ्चालक रमेश हतुवालीले बताए । उनले केही दिनयता धरानका मदिरा पसलहरूमा ‘मोबाइल पे गर्छु’ भन्दै ब्राण्डेड रक्सी लिएर भाग्ने गरेकाे व्यवसायीले बताएका छन् ।

भानुचोकबाट पक्राउ परेका उनले मदिरा पसलका मालिकहरू नभएको मौकामा रक्सी किन्ने बहाना गर्दै चोरेर हिँड्ने गरेको हतुवालीले बताए । साहले मंगलबार बीपी प्रतिष्ठानस्थित निर्भाना कन्ट्री क्लबबाट ब्याक लेबल लिएर हिँडेका थिए । सोमबार धरान–७ भानुचौकको मनकामना कोल्ड ड्रिङ्क्समा ब्ल्याक चिम्नी र ओल्ड दरबार लिएपछि ‘मोबाइल पे गर्दिन्छु’ भन्दै हिँडेका थिए ।

धरान १५ श्याम चोकस्थित एक पसलमा मदिरा लिएर मोबाइल पे गर्छु भनेपछि मालिकले भुक्तानी नहुन्जेल हुँदैन भनेर रोकेका थिए । त्यहाँबाट हिँडेका साहलाई व्यवसायीले निगरानीमा राखेका थिए । त्यसबीचमा उनी चोरेको मदिरा बेच्न सोमबार भानुचोकस्थित बाबा कोल्ड ड्रिङ्क्समा पुगे । त्यहाँका कर्मचारीहरूले मालिक नभएको बताउँदै फिर्ता पठाए । मंगलबार फेरि चोरीको मदिरा बेच्न फेरि पुगेपछि प्रहरीको जिम्मा लगाइएको बाबा कोल्ड ड्रिङ्क्सका मालिक श्रवण गुप्ताले बताए ।

साहले चोरीको सिग्नेचर ह्विस्की बेच्न बार्गेनिङ गरेका थिए । शंकास्पद गतिविधि गरेपछि मदिरा व्यवसायी सङ्घको सूचनाका आधारमा उनी समातिएका हुन् । साह मदिरा चोरी र ठगीका लागि बा ७ च ४४८० कार चढेर आउने गरेका थिए । उनीसँग संस्कृति, पर्यटन मन्त्रालयको शाखा अधिकृतको नक्कली परिचय पत्र पनि भेटिएको छ । मदिरा व्यवसायीले समात्दा उनले आफूलाई डाक्टर बताउँदै छाडिदिन अनुनय गरेका थिए । साहबारे अनुसन्धान भइरहेको इलाका प्रहरी कार्यालय धरानले जनाएको छ।