काठमाडौं, १२ जेठ । टिकापुर काण्डका मुख्य अभियुक्त रेशम चाैधरीले सजाय माफी गरी आफूलाई कैदमुक्त गर्न माग गर्दै राष्ट्रपति समक्ष पेश गरेकाे पत्र गृह मन्त्रालय पठाइएकाे छ । राष्ट्रपति रामचन्द्र पाैडेलका प्रेस सल्लाहकार किरण पोखरेलले  राष्ट्रपति कार्यालयले गृह मन्त्रालयमा फाइल फिर्ता गरेको जानकारी दिए ।

राष्ट्रपति कार्यालयले पत्रकाे जवाफमा आम माफीसम्बन्धी प्रचलित कानुन, सर्वोच्चको फैसला, सर्वोच्च अदालतद्वारा प्रतिपादित सिद्धान्त विपरीत नहुने गरी कानुन बमोजिम गर्न भनेर गृह मन्त्रालयमा फाइल फिर्ता गरेको छ ।

जन्मकैदको सजाय काटिरहेका रेशमले बाँकी सजाय माफीका लागि दिएको निवेदन गृह मन्त्रालयबाट राष्ट्रपति कार्यालयमा पुगेको थियो । टिकापुरमा २०७२ भदौमा ७ जना सुरक्षाकर्मी र एक नाबालकको मृत्यु हुने गरी भएको हिंसात्मक घटनामा दोषी ठहर भई जन्मकैदकाे सजाय भएकाे थियाे ।

उनी २०७४ फागुन १५ गतेदेखि थुनामा छन् । उनलाई अदालतले तोकेको जन्मकैदको सजाय अनुसार, २० वर्ष कैद भुक्तान गर्नुपर्छ ।