काठमाडौं, २९ वैशाख । हिजाेदेखि जारी नेकपा एमालेको केन्द्रीय कमिटी बैठकमा आज प्रतिवेदनहरुमाथि समूहगत छलफल हुँदैछ । केन्द्रीय कमिटीको बैठकमा पार्टी अध्यक्ष केपी शर्मा ओलीले राजनीतिक प्रतिवेदन पेश गरेका थिए । यस्तै, चार निकाय र दुई गैरभौगोलिकसहित नौ प्रदेश कमिटीले मिसन ग्रासरुट अभियान सम्बन्धी प्रतिवेदन पेस गरेका थिए ।

महासचिव शंकर पोखरेलले आजकाे बैठकमा ती प्रतिवेदनहरुमाथि समूहगत छलफल सुरु हुने बताए । प्रतिवेदनहरुमाथि बिहान ८ देखि १२ बजेसम्म आठ समूहमा छलफल गर्ने कार्यतालिका छ ।

मिसन ग्रासरुट अभियानको निष्कर्षको आधारमा आगामी दिनमा कसरी कार्ययोजना बनाएर अघि बढ्ने भन्ने विषयमा समूहगत छलफल केन्द्रित हुने छ ।

समूहगत छलफलपछि प्रदेश अध्यक्षहरुले सुझावहरु प्रस्तुत गर्ने त्यसका लागि अध्यक्षहरुलाई १० मिनेटको समय उपलब्ध गराइएको छ । त्यसपछि आजै स्थायी कमिटीको बैठक बस्ने र प्रदेश अध्यक्षहरुबाट प्राप्त सुझावका आधारमा स्थायी कमिटी बैठकले आगामी कार्ययोजनाको प्रस्ताव तयार गर्नेछ ।

कार्ययोजनाको प्रस्ताव तयार पारिसकेपछि पुनः केन्द्रीय कमिटीको बैठकबाट कार्ययोजनाको प्रस्ताव पारित गरिने भनिएकाे छ । त्यसपछि समसामयिक प्रस्तावहरु पारित गरेर अध्यक्ष ओलीले बैठकलाई सम्बोधन गर्ने कार्यतालिका छ । भाेली केन्द्रीय समिति बैठक सम्पन्न गर्ने एमालेको कार्यतालिका रहेकाे छ ।