काठमाडाैं, २५ फागुन । जनयुद्धमा मृत्यु भएका ५ हजारकाे जिम्मा लिने अभिव्यक्ति दिएर विवादमा परेका प्रधानमन्त्री पुष्पकमल दाहाल प्रचण्डविरुद्ध परेको मुद्दाको पहिलो सुनवाइ आज हुँदैछ । गत मंगलबार माओवादी केन्द्रका अध्यक्षसमेत रहेका दाहालमाथि गत मंगलबार पाँच हजार जनाको हत्या गरेको भन्दै मुद्दा दायर भएकोमा आज त्यसमाथि पहिलाे सुनुवाइ हुन लागेको हो ।

२०७६ साल माघ १ गते टुँडिखेलमा आयोजित माघी महाेत्सवमा प्रचण्डले सशस्त्र द्वन्द्वमा मारिएका १७ हजारमध्ये ५ हजार जनाको मात्र आफूले जिम्मा लिने अभिव्यक्ति दिएका थिए ।

सोही अभिव्यक्तिलाई लिएर अधिवक्ता ज्ञानेन्द्रराज आरण र द्वन्द्वपीडित कल्याण बुढाथोकीले गत मंगलबार दायर गरेको रिटमा आज प्रारम्भिक सुनुवाइ हुन लागेको हो । माओवादीहरूले भने यो विषय सत्य निरुपण तथा मेलमिलाप आयोगले हेरिरहेको भन्दै नियमित अदालतले हेर्न नमिल्ने बताउँदै आएका छन् ।

सुरुमा सर्वोच्च प्रशासनले राजनीतिक अभिव्यक्तिमा टेकेर पेश भएको निवेदन दर्ता हुन नसक्ने भन्दै दरपीठ गरेकोमा निवेदकहरू पुनः अदालत गएका थिए । त्यसपछि न्यायाधीश ईश्वर खतिवडा र हरि फुयालको संयुक्त इजलासले शुक्रबार रिट दर्ता गर्न आदेश दिएको थियो । सोही आदेशअनुसार फागुन २३ गते कानुन व्यवसायीहरुले रिट दर्ता गराएका थिए ।

यसैबीच सरकारले आजै सत्य निरुपण तथा मेलमिलापसम्बन्धी संशोधित विधेयक प्रतिनिधिसभामा दर्ता गर्ने निर्णय गरेको छ । आज बिहान सिंहदरबारमा बसेको मन्त्रिपरिषद्को बैठकले उक्त विधेयक आजै प्रतिनिधिसभामा दर्ता गर्ने निर्णय गरेको हो ।