भक्तपुर, १५ साउन । नेपाल इन्जिनियरिङ कलेज (नेक) का तीन आर्किटेक्ट डिजाइनर पुरस्कृत भएका छन् । क्रानिअफिसियल सेन्टर नेपाल (सीएफसी) ले आयोजना गरेको प्रतिष्पर्धामा उत्कृष्ट तीन आर्किटेक्ट डिजाइनरलाई आज एक कार्यक्रमका बिच नगद पुरस्कार सहित पुरस्कृत गरियो ।

अनुहार, मुखको घाउ तथा ओठ काटिएका हरुको उपचार र पुनर्स्थापनामा काम गर्दै आइरहेको सीएफसीले जनकपुरमा निर्माण गर्न लागेको आवासीय भवन तथा पुनर्स्थापना सेन्टर भवनको डिजाइन बनाउन नेकमा आर्टिटेक्ट चौथो वर्षमा अध्ययनरत अध्ययनरत आठ विद्यार्थीहरू छनौट गरी प्रतिष्पर्धा गराएको थियो ।

‘व्युल्डिङ फेस व्युल्डिङ फ्युचर’ भन्ने नाराका साथ भएको इन्क्लुसिभ डिजाइन कम्पिटिसनमा हिमाल रोकायाको डिजाइन प्रथम हुँदा अनुष्का गैरेको डिजाइनले दोश्रो स्थान हासिल गरेको छ । प्रतिष्पर्धामा शौरभी वर्मा शाखको डिजाइनले तेश्रो स्थान हासिल गरेकोमा उनीहरूले क्रमशः नगद पुरस्कार ५० हजार, ३० हजार र २० हजार सहित प्रमाणपत्र समेत प्राप्त गरे ।उक्त प्रतिष्पर्धामा सहभागीहरूले गुगल म्यापमार्फत जनकपुरमा रहेको प्रोजेक्ट साइटको ४ बिगाहा, ७ कठ्ठा, १७।५ धुर जग्गाको स्वरुप अनुसार आयोजकले दिएको डिजाइन मापदण्डमा रहेर डिजाइन गरेका थिए ।

सीएफसी नेपालले आउँदो अगष्ट ४ मा उत्कृष्ट तीन डिजाइनहरुको जनकपुरमा प्रदर्शनी समेत गर्ने कार्यक्रम रहेकाे छ ।

डिजाइन प्रतिष्पर्धामा भाग लिएका विद्यार्थीहरूले आफुले कलेजबाट हासिल गरेको सीप र ज्ञानलाई प्रस्फुटन गर्न पाउँदा गौरब लागेको बताउँदै प्रतिष्पर्धामा भाग लिँदा हासिल गरेको अनुभवहरु सुनाएका थिए । यस्ता प्रतिष्पर्धाहरुले विद्यार्थीले हासिल गरेको ज्ञान र सीपलाई परख्ने बताइएको छ ।

नेकका प्रिन्सिपल प्रा.डा. हरिकृष्ण श्रेष्ठले विद्यार्थीहरूले कलेजमा हासिल गरेको ज्ञान र सीपलाई बाहिर ल्याउन यस्ता प्रतिष्पर्धाहरु उपयोगी हुने तथा विद्यार्थीहरूले गरेको प्रगतिमा कलेजले पनि गर्व गर्ने बताए । कार्यक्रममा एकेडेमिक काेअर्डिनेटर एसोसिएट प्राेफसर बाबुराम भट्टराई, विभागीय प्रमुख सायमी, सीएफसी नेपालका संस्थापक डा. साह लगायतले डिजाइन प्रतिष्पर्धाका बारेमा बाेलेका थिए ।

पुरस्कृत डिजाइनर विद्यार्थीहरूलाई कार्यक्रमका विशिष्ट अतिथि गायक योगेश्वर अमात्य, सीएफसी नेपालका संस्थापक डा. सुनिल साह, नेकका प्रिन्सिपल प्रा.डा. हरिकृष्ण श्रेष्ठ, फ्युचर फेसका एफ ए मार्कसले पुरस्कारहरू प्रदान गरेका थिए ।