भक्तपुर, ३ असार । काठमाडौं मेडिकल कलेज दुवाकोट भक्तपुर, सामुदायिक अस्पताल दुवाकोट तथा रोट्रयाक्ट क्लब अफ केएमसी दुवाकोटको आयोजनामा २१० जनालाई हेपाटाइटिसको खोप लगाइएको छ ।

स्थानीय सर्वसाधारण तथा कलेजका विद्यार्थीहरुले हेपाटाइटिस ‘बी’ विरुद्धको खोप लगाएका हुन् । पछिल्लो समय मानिसको कलेजोमा संक्रमण बढ्दो रुपमा देखा परेसँगै हेपाटाइटिस ‘बी’ नियन्त्रण गर्ने अभियान अन्तरगत केएमसीले समुदाय स्तरमा खोप कार्यक्रम सञ्चालन गरेको केएमसीका जनरल मेनेजर नारायण दाहालले बताए ।

गाउँगाउँमा निःशुल्क स्वास्थ्य शिविर सञ्चालन गरेर सामाजिक उत्तरदायित्व समेत निर्वाह गर्दै आइरहेको केएमसीले हेपाटाइटिस जस्तो संक्रामक रोग उल्मुलनका लागि पनि अभियान चलाउँदै आएको छ ।

केएमसीका कार्यकारी अध्यक्ष डा. सुनिल शर्माले आम नागरिकलाई सर्वसुलभ स्वास्थ्य सेवा पुर्याउने उद्देश्यले केएमसीको स्वास्थ्य सेवाहरुलाई समुदाय स्तरमै प्र्याउने काम भइरहेको बताए । डा. शर्माकै नेतृत्वमा काठमाडौं मेडिकल कलेज प्रा.लि.लाई पब्लिक लिमिटेडमा रुपान्तरण गरेर त्यहाँको स्वास्थ्य सेवामा सर्वसाधारणको पहुँच पुग्ने बनाइएको छ ।

हेपाटाइटिस ‘बी’ भाइरस (एचबीभी) को कारण लाग्ने संक्रामक रोग हो। यो रोगले खासगरी मनुष्य र बाँदरको प्रजातीको कलेजोलाई सङ्क्रमित गर्छ, जसको कारणले कलेजो सुन्निने, पोल्ने गर्दछ । जसलाई हेपाटाइटिस भनिन्छ।

हेपाटाइटिस ‘बी’ भाइरस व्यक्तिको संक्रमित रगत वा शरीरको तरल पदार्थबाट सर्ने गर्दछ ।