काठमाडौं । सिनामंगल स्थित काठमाडौं मेडिकल कलेजले ६ महिना देखि २ वर्ष सम्मको कुपोषण भएका बालबालिकालाई निःशुल्क ‘पोषण प्याकेट’ उपलब्ध गराउने भएको छ । पोषण प्याकेट २५ ग्रामको रहेको छ ।

बलियो नेपाल न्यूट्रिसनसँगको सहकार्यमा केएमसीले निःशुल्क पोषण प्याकेट उपलब्ध गराउने भएको हो । कुपोषणको शिकार भएका बालकालिकाको स्वास्थ्यलाई ध्यानमा राखी कार्यक्रम ल्याएको केएमसीका जेनेरल मेनेजर नारायण दाहालले बताए ।

बाल चिकित्सक पावना कायस्थले पोषण प्याकेटमा बालबालिकालाई अत्यावश्यक पौष्टिकतत्व सहितको लिटोको पिठो हुने जानकारी दिइन् । पोषण प्याकेट कार्यक्रमका लागि केएमसीमा पोषण क्लिनिक प्रत्येक दिन दिउसो २ बजेपछि सञ्चालन गरिने छ । केएमसीले निःशुल्क उपलब्ध गराएको पोषण पिठोले कुपोषण भएका शिशुलाई दैनिक १ पटक खुवाउँदा तीन महिनासम्म पुग्ने बताइएको छ ।

सम्झौता कार्यक्रममा अस्पतालका निर्देशक डा. सुमन श्रेष्ठ र प्रशासकीय अधिकृत प्रेम थापा, जेनेरल मेनेजर नारायण दाहाल लगायतको उपस्थिति रहेको थियो ।

केएमसीका कार्यकारी अध्यक्ष डा. सुनिल शर्माले पोषण प्याकेट कार्यक्रमले ६ महिना देखि २ वर्ष सम्मका शिशुहरुमा हुने कुपोषण न्यूनिकरण गर्न टेवा दिने बताए । केएमसीले स्वास्थ्य  सेवा लिन आउने बिरामीहरुका लागि विभिन्न लाभदायी कार्यक्रम सञ्चालन गर्दै आएको बताउँदै डा. शर्माले आउँदा दिनहरुमा अझ प्रभावकारी कार्यक्रमलाई सञ्चालन गर्ने बताए ।