पर्सा । वीरगञ्ज स्थित न्युरो सेन्टर नेशनल मेडिकल कलेज एण्ड टिचिङ हस्पिटलमा दुई विरामीको सफल शल्यक्रिया गरिएको छ । आधुनिक तरिकाले ब्रेन तथा स्पाइनको उपचार गर्दै आएको यस हस्पिटलले दुई उमेर समुहका विरामीको सफल शल्यक्रिया गरेकाे हाे ।

हस्पिटलले सर्लाहीका ८ वर्षीय सियानन्दन रायको टाउकोको पछाडि रहेकाे ठूलाे ट्युमरकाे सफल शल्यक्रिया गरेकाे छ । टाउकाेमा ठूलाे ट्युमर पलाउँदा  निरन्तर टाउको दुख्ने, वान्ता हुने तथा हिँडडुलमा समेत समस्या थियो ।  तर, नेशनल हस्पिटलले सफल रूपमा शल्यक्रिया गरिदिएपछि बालकलाइ राहत भएकाे छ ।

नेशनल मेडिकल कलेजका वरिष्ठ चिकित्सक डा. सफरोज अन्सारी र उनका सहयोगी डा. मसउद, डा. आदित्यलगायत न्युरो सर्जरी टिमले बालककाे टाउकाकाे सफल शल्यक्रिया गरेका हुन् । शल्यक्रिया पश्चात् बालक आफैं हिँडडुल गर्न सक्ने भएका छन् । उनकाे स्वास्थ्यमा दैनिक सुधार हुँदैछ ।

त्यस्तै गरी, नेशनल हस्पिटलले ६५ वर्षीय मोहनराज उपाध्यायको मस्तिष्ककाे बायाँ भागमा पलाएकाे ट्युमरकाे पनि सफल शल्यक्रिया गरिएकाे छ । मस्तिष्कमा रहेकाे ट्युमरका कारण उपाध्याय बोल्न नसक्ने, मान्छे नचिन्ने, बान्ता हुने जस्ता गम्भीर समस्याहरु बाट पिडीत थिए ।  उनकाे पनि डा. अन्सारीको टिमले सफल शल्यक्रिया गरेकाे हाे । मस्तिष्ककाे ट्युमर निकालेकाे दुइ दिन नवित्दै उपाध्याय बोल्न, मान्छे चिन्न थालेका छन् ।

मधेश प्रदेशमै अत्याधुनिक तथा सुविधासम्पन्न न्यूराे सेन्टर सञ्चालनमा आएपछि लाखाैं खर्च गरेर काठमाडाैंका महंगा अस्पताल तथा भारतका अस्पतालमा उपचारार्थ जानुपर्ने बाध्यता हटेकाे भन्दै बिरामीका आफन्तले खुसी व्यक्त गरेका छन् ।

मधेश प्रदेशकै एक मात्र ठुलो नेशनल मेडिकल कलेज एण्ड टिचिङ हस्पिटल र न्युरो सेन्टरमा ब्रेन र स्पाईन सम्बन्धी सबै किसिमको शल्यक्रिया गरिन्छ। काठमाडौं समेतमा विरलै हुने शल्यक्रियाहरू हस्पिटलले गरी विरामीकाे जान जोगाएकाे न्यूरो सर्जन डा. अंसारीकाे भनाइ छ ।