काठमाडौं । रंगहरुको पर्व फागु पुर्णिमाको पहिलो दिन काठमाडौं उपत्यकामा विशेष रह्यो । कोरोना महामारीका कारण २ वर्ष फागु मनाउन बञ्चित सर्वसाधारण यसपल्ट खुलेर घर बाहिर निस्किए । हरेक वर्ष होलीको दिन राजधानीको बसन्तपुरमा विशेष आकर्षण हुने गरेको छ । यो वर्ष न्यूरोड बसन्तपुर गएर होली खेल्नेहरु विगतका वर्षहरुमा भन्दा बढी देखिए ।

योसँगै टुंडिखेल, भृकुटीमण्डप, नयाँ बानेश्वर, लगनखेल लगायतका स्थानमा पनि होली खेल्नेहरुको भिडभाड छ । विगतका होलीहरु भन्दा योपल्टको होली सोहार्दपूर्ण र हार्दिकतापूर्ण भएको युवाहरुको भनाई छ ।

बसन्तपुरमा होली खेल्न भेला भएका युवायुवतीहरुले एक अर्कामा हार्दिकताका साथ रंग लगाएका छन् । बसन्तपुरमा आयोजित सांगितिक कार्यक्रममा युवायुवतीहरु मज्जाले झुमेका देखिन्थे ।

आज मुलुकका पहाडी जिल्लाहरुमा होली पर्व मनाइएको छ । भोली तराईका जिल्लाहरुमा धुमधामका साथ होली मनाउने गरिन्छ । होली पर्व हिन्दुधर्मावलम्बीहरुले धुमधामका साथ मनाउने गरेपनि पछिल्ला वर्षहरुमा गैरहिन्दु धर्मावलम्बीहरु समेत सहभागी भएर मनाउने गरिएकाले यो पर्वलाई हार्दिकता, एकता र भाइचाराको पर्वका रुपमा लिन थालिएको छ ।

हेर्नुहोस् थप फोटोहरुः