काठमाडाैं । धरानस्थित विपी कोइराला स्वास्थ्य विज्ञान प्रतिष्ठानका हाडजोर्नी विशेषज्ञ डा. रोशनप्रसाद शाह कलवारलाई तीन महिना निलम्बन गर्ने भएकाे छ । नेपाल मेडिकल काउन्सिलले डा. कलवारले बिरामीको शल्यक्रियाको क्रममा अवाञ्छित तथा गैरकानुनी कार्य गरेको र चिकित्सकीय आचरणको न्यूनतम मापदण्ड पालना नगरेको भन्दैं निलम्बनको प्रक्रिया अगाडि बढाएको श्राेतकाे दावी छ ।

प्रतिष्ठानमा गएकाे २९ पुसमा एक बिरामीको शल्यक्रिया गरी स्टील (साइन नेल) लगाउने विषयमा विवाद भएकोमा काउन्सिलले उक्त घटनामाथि छानविन गर्न समिति बनाएको थियो । उक्त समितिले दिएको प्रतिवेदनका आधारमा काउन्सिलको पूर्ण बैठकले डा. कलवारलाई तीन महिना लागि व्यवसायिक कार्य गर्न निलम्बन किन गर्ने ? भनेर स्पष्टीकरण सोध्ने निर्णय गरेको छ ।

उक्त छानविन समितिमा काउन्सिलका आचारसंहिता तथा स्वास्थ्य समिति संयोजक डा. हरिहर वस्ती संयोजक, काउन्सिलका सदस्य डा. कालुसिंह खत्री र हाडजोर्नी विशेषज्ञ डा. गणेश गुरुङ सदस्य रहेका थिए ।  

काउन्सिलले विपी कोइराला स्वास्थ्य विज्ञान प्रतिष्ठानलाई हाडजोर्नी विभागबाट प्रयोग गरिने र विदेशी दातृ संस्थाबाट प्राप्त हुने साइन नेल सम्बन्धि आवश्यक निर्देशिका बनाउन पनि निर्देशन दिने निर्णय गरेको छ ।

बिरामीको उपचारमा संलग्न अन्य दुई चिकित्सक डा. अमित विक्रम शाह र डा. अमित लिम्बुलाई आइन्दा त्यस्ता गतिविधीमा संलग्न नहुन सचेत गराउने निर्णय गरेको श्राेतकाे भनाइ छ । आफ्नो विभागमा पटक–पटक यस्ता विवाद हुँदा पनि निरुपण गर्न नसकेको भन्दै विभागीय प्रमुख प्रा. डा. विक्रम श्रेष्ठलाई पनि सचेत गराउने निर्णय भएको काउन्सिलका एक सदस्यले बताए ।